Dahulu sangkek marapi tampak sagadang talua itiak, tibolah Sri Sutan Maharajo Dirajo sarato kawan-kawan singgah sakijok malapeh panek, duduk saunjua, minum saraguak, sarato lalok sapiciang di tanah nan hijau tiado kiro. Hutannyo lenggek balenggek, danaunyo silang manyilangi, bukiknyo barih babarih, jo lambahnyo bajajaran, nyato kuaso Tuhan nan surang. Tujuah lenggek langik kuasonyo, sarugo jo narako bukti adonyo, sarato bumi tacinto haratonyo. Tanieklah Sri Sutan Maharajo Dirajo sarato kawan-kawan tingga bamukim di nagari elok nantun. Iduik dari alam nan rancak, tingga basawah ba ladang, jo baburu kasudahannyo.
Nagari nantun banamo Minangkabau. Ramah tamah panduduaknyo. Bagotong royong karajonyo. Susah sanang basamo samo. Siang basawah mamangkua bagiliran. Malam ka lapau main koa jo minum teh talua. Nan padusi elok laku jo manih muluik. Manumbuak padi jo lasuang karajonyo. Malam kasurau pai mangaji jo sumbayang. Nan induak-induak si bundo kanduang dalam rumah gadang. Tingkuluak kabasarannyo, bijak jo rancak kato-katonyo. Nan bujang tingga disurau. Baraja mangaji sabalun gadang. Pai marantau kasudahannyo. Basilek kapandaiannyo. Lincah gariknyo lagi pandai di rantau urang. Pai marantau mancari pitih, haram bapulang sabalun jadi urang. Baitu bana elok laku nagari nantun. Anak cucu angku Sutan Maharajo Dirajo.
Wakatu baputa, alam barubah. Co itu pulo Minangkabau. Indak surang gadihnyo nan lah co urang lua. Bapakaian bantuak ka indak. Sado tabukak saroman indak babaju. Surau batinggakan, gotong royong balupokan. Ndak bakatauan jo kawan sabalik. Malu bagai manonton saluang jo dendang. Manumbuak padi kok indak kapandai manggiliang lado kok ka lai. Iko nan indak ciekpun juo. Lidah bakasumbarangan, indak lai mangarati baso jo basi sarato hereang jo gendeang. Ndak tantu kato mandaki jo kato manurun. Jo urang gaek co samo gadang, jo kawan sapamainan sakandak hati. Co itu bana parubahan. Indak lai takato rancak, jauah bana jo niniak mamak. Baa kok mantun nagari awak? Indak kok takana jo niniak moyang sarato ajaran adat nan basandi sarak, sarak nan basandi kitabullah!
Indak kok rancak nan dahulu mangkok baputa madok kito sadonyo! Maimbau kami ka kawan sagalonyo. Kok lai ka rancak bantuak dahulu. Mari kito babaliak ka rumah gadang baliak, babaliak kasurau, sarato baliak ka adat nan basandi sarak. Co apo bana nan elok laku minangkabau nantun.
0 komentar